Legenda Dewi Rengganis 7 : Raja Amir Hamzah

Pangkur 

Ganti anu dicatur

Sultan Arab jenengan Menak Amir

Dina waktu isuk isuk

Sang Raja Amir Hamzah

magelaran kumpul para ratu sewu

hurung mancur cahayana

panganggo para narpati

Anu calik dipayun, Raja Maktal anu jadi papatih.

Bagenda Hamzah ngadawuh,"Eh Yayi Patih Maktal, rasa kakang enggeus pirang pirang minggu, Ki Dipati Narpatmaja henteu ngadeuheus ka kami. Wantuning panganten anyar, sukur sewu geus lulut raki rabi."

Patih Maktal enggal matur ka Raja Amir Hamzah, "Jisim abdi aya nu dipiunjuk, perkawis putera gamparan, sumuhun yen enggeus lami. Enggeus aya dua bulan makuwona matuh di taman sari, henteu pisan kersa wangsul ka Karang Kadipatyan. Malah lali ka garwa tacan salulut, Raden Arya Narpatmaja panginten kenging panyakit. Kawas anu kaleleban, kasawatna kawas kaalap badis mun datang kasawat tangtu, sok lajeng kapidara, lami pasan tilu jam teu emut-emut. ari enggeus kapidara, putra gamparan sok lilir. sarta lajeng bae lenggah, ku panginten abdi nu cupet budi Rahaden Suwangsa tangtu kalindih mamanahan, ku kasawat pangacian asa jauh, sareng sasauran sasar, jeung tanggah bae ka langit. 

Sarta bari sasauran, sisindiran nyambat nu lain-lain. Sasauran taya batur sareng sok ngagupayan, jeung mureleng bae socana ka luhur. gumujeng kalangkung suka, istuning ngomong pribadi. Pepetetan di jero taman, kembang-kembang sagala kai-kai, ku putera hantem bae di rungrum, tegesna di kawihan, mun nalika datang kasawatna kitu, jeung upami eukuer senggang, nangkuban teu pisan lilir. Henteu kersa sasauran, hulang huleng kawas aya kaeling. Panangan ngahurung balung, kitu mun mangsa senggang. Siga jalma anu keur tapa ngabisu, ti peuting sarta ti beurang, henteu usik henteu malik."

Sanggeusna ngarungu warta, Menak Hamzah kalangkung duka galih, semuna kalangkung alum, tina bawaning welas. Amir Hamzah ngadawuh sarta mios luh, tegesna medal cisoca, wantuning putera kakasih. Kalangkung sungkawa manah rehing eukeur katerapan panyakit, sakedapt teu yasa nyaur tina kaget manahna. Henteu lami, Bagenda Hamzah ngadawuh, sarta bari nepak dada

"Kutan Ki Suwangsa gerin? Maktal, saha nu bebeja yen Suwangsa katerap ku panyakit?"

Patih Maktal enggal matur, "Dupi anu wawarta, abdi Gusti Raden Tumenggung Toh Bahu."

Dawuhan Bagenda Hamzah, "Sangkilang geus lila gering, henteu aya nu unjukan yen Suwangsa gering sering teu eling. Hina temen Ki Tumenggung dijieun rorok Agan."

Raden Maktal enggal nyembah sareng matur, ka Raja Bagenda Hamzah, "Gusti, kieu anu mawi sadaya abdi Gamparan teu enggal miunjuk ka Dampal Gusti. Yen Sang Raja Putra ngangluh. Raden Iman Suwangsa wewekasna saha-saha nu miunjuk majah ka linggih Paduka meureun ditumpes ku kami. Kitu matakna teu enggal dipiunjuk ngangluhana putra Gusti."

Lajeng Amir Hamzah kondur tina gelarana. Para ratu nu ngadeuheus sami wangsul ka bumina sewang sewang. Amir Hamzah geus melebet puri. Dideuheusan di witana, tegesna teh bale witana pasti, lamun mungguh basa gunungnya eta gendeng tea, geus disaur garwa Hamzah Nyi Marpinjung, saderek Siti Munigar, enggeus kagarwa ku Amir.

Amir teh turun karanjang, seenggeusing pupus Munigarim, geulisna Dewi Marpinjung lir gambar jijieunan, putra Raja Nursewan nagri Madayun. Dewi Marpinjung harita geus di payuneun Amir. Medek ka Bagenda Hamzah, Nyi Marpinjung kalangkung hormat takdim, jeung deui anu disaur ku Gusti Amir Hamzah nu jenengan Ratna Dewi Jarah Banun, garwa Raden Patih maktal, puteri nu geulis ti Mesir

Ngadawuh Bagenda Hamzah ka rai Meswari Marpinjung Dewi, jeung ka Dewi Jarah Banun, "Saurna Narpatmaja jeung garwana teu acan pisan salulut, malah malah saayeuna Ki Suwangsa eukeur gering. Suwangsa keuna rencana, tayoh-tayoh katerap elmu sihir, karana Suwangsa tangtu rea awewe hayang. Saperkara kasep sarta putra ratu, tangtu rea nu kabita, hayang milu sugih muktil. Nu hayang henteu kasorang, enggeus jadi nerapkeun elmu sihir. Tangtos jadi burung palung, kuma onam nu ngewa. Dapon puas henteu sieuneun kaduhung, arang nu ras ka aherat, supaya puas di lahir."

Sanggeus tamat mopoyanna, Menak Hamzah lajeng nimbalah deui, "Eh ayi Nyi Jarah Banun, geuwa geura mapajang pangkuleman lalangse katil kulambu, nu leuwih bisa mapajang anging Jarah Banun Dewi. Keur nyawisan Narpatmaja sina pindah bae ka jero puri. Karana di luar tangtu rea rea gogodana, anu matak jeung rabina henteu matut, leuwih hade jero pura sarimbit jeung Sulasikin. Ari salaki manehna, Raja Maktal rek dititah ku kami leumpang ka Banjaran Santun, mapagkeun Ki Suwangsa, sina pindah ulah aya nu dikantun, sarahayatna Suwangsa budalkeun wae ka jero puri."

Nimbalan deui Bagenda, miwarang nyaur Rahaden Patih, enggal nyembah nu diutus, parekan geus kaluar, ngadawuhkeun yen raden kudu disaur, tuluy hiji gandek gancang, datang ka payuneun Patih.