Tatangga si Kabayan aya nu hajatan, imahna pagigir gigir. Kabeh pada diondang, ngan si Kabayan nu teu diondang ma'lum da jalma miskin. Atuh si Kabayan nu tadina geus bungah bakal dahar lauk kalahka ngegel curuk. Lantaran kesel manehna datang ka tempat hajatan, make calana kolor hungkul teu make baju. Di imah tatanggana teh rame ku nu ondangan, si kabayan ka pipir imah nu hajat bari ngadeupan (ngameteran) tembok imah, bari ngomong, hiji, dua, tilu...terus ngadeupaan nepi ka palebah dapur.
Nu hajat ngarasa era ningali si Kabayan kalakuan kitu teh bari di tonton ku jelema rea. Tatanggana ngadatangan bari ngomong rada nyentak, "heh, Kabayan, nanaon ari maneh? Siga budak leutik wae bubulucun bari nanaonan ngadeupaan imah?!" Ceuk nu hajat bari satengah kesel.
"Ah, mun kolot mah uing pasti diondang,"Ceuk Si Kabayan bari terus wae ngadeupaan imah.
Nu boga hajat, ulungah elengeh rada era ka jalma rea. Pok ngomong ka Si Kabayan, "Heueuh, Jig Kabayan pake baju, datang jeung si Iteung kadieu, ku kami di ondang, hampura wae kuring poho."
"Bener yeuh? Sukur atuh, "Ceuk si Kabayan bungah bari teu ngadua kali dititah, balik ka imahna ngajak si Iteung kondangan.
0 komentar:
Post a Comment