Purnama Alam Masantren di Resi Muhammad Kurbah : Purnama Alam 3

Sinom

Arya Patih ngawangsulan, “Menggah abdi dalem yakti, katur sakalintang rempag, kana sadaya panglahir, amung kedah dijagi, bilih ngalolos teu puguh, ti gunung Gurangsarak”. Saur Ratu, “Bener Patih, poe isuk anterkeun ku sarerea.

Ayeuna kudu sadia, gulang gulang para mantri, nganteurkeun Purnama Alam, ka resi paguron santri, reujeung ayeuna misti nitah mantri buru buru, ka gunung Gurangsarak, mawa surat keur Resi, mere terang baris datang Ki Purnama.”

Sanggeus nimbalan Sri Nata, lajeng miwarang mantri, nyaur ka Sang Purnama Alam, gancangna anu digurit, Pangeran Putra sumping, ngadeuheus ka payun Ratu, lenggah bareng jeung sembah, henteu lami Sang Narpati, ngadawuh ka Raja Putra Purnama

“Eh Ujang Purnama Alam, anak ama buah ati, anu matak dicalukan, ama teh arek badami, ku sabab leuwih leuwih, ama nandang pikir sukur, bungah taya padana, nenjo ka ujang pribadi, junun wekel kana ngalap pangabisa.

Malah geus jadi utama, nyangking harti pilih tanding, tur mashur satia rasa, ama leuwih bungah ati, ngan aya anu jadi kana ngaburungkeun sukur, matak rempat pikir, ama manggih beja sidik , yen ujang teh matak tagiwur nagara,

Ku sabab eta ayeuna, purun teu purun ge misti, ujang teh saheulaanan, ulah aya di jero nagri, samemeh boga rabi, kudu masantren ka wiku, di gunung Gurangsarak, tempat jauh sarta suni, itung itung nyingkiran kabalahian.

Jeung kadua perkarana, ama enggeus tampa deui , pangangker Ratu Ambarak, nikah teh ngajakan gasik, di bulan hareup misti, ku ama enggeus diwangsul, neda tempa heulaan, disebut ujang kur ngaji , di Pasantren Gurangsarak.

Anu matak kudu pisan, ujang teh ulah rek mungkir, masantren di Gurangsarak, poe pageto nya indit dianteur ku pramantri.” Sang Putra nyembah ngawangsul, ka Rama Sri Mahraja, jeung tumungkul langkung ajrih, “Abdi Gusti mung katur sadaya daya,

Sumeja kumambang pisan, kana sugrining panglahir, mios ti dayeuh Riskomar, ka padesan tepis wiring, gunung liwung nu rumbit, menggah abdi gusti estu, sumawonten parekna, dipangkonan dampal Gusti, najan tebih raratan meuntas lautan.

Abdi Gusti tumut pisan, ing siang kalayan wengi.” Sri Maha Ratu ngadika, “Sukur ujang hanteu mungkir, ayeuna sing tarapti, beberes urus urus, bawakeun barang uang, ulah aya nu kari, barang-barang pangeusi karang kaputran!”

Saparantos ngadawuhan, sadaya bubar ti puri, sejana sasadiaan, ari nu dijurung indit, ngiberan ka Sang Resi, Raden Mantri Dendaturu, miosna tunggang kuda, kawantu jalanna tebih, tujuh poe jajahan ku anu leumpang.

Ari Pangerang Purnama, lain jadi ngangres galih, yen nampi dawuhan rama, teu kenging aya di nagri, anggur leuwih ngajadi nandang gumbirana kalbu, ari nu jadi sabab, pangbingah lantaran tebih reujeung anu rek maksa kana garwaan.

Gancangna ieu carita, tunda nu aya di nagri, kacatur di Gurangsarak, ngaran pasantren Pramanik, kenging ngalandi resi, dimashurkeun ngaran kitu, ari jenenganana, eta anu jadi resi, kongas nelang sang Resi Muhamad Kurbah

Kamashur ka mana-mana, Resi pasantren Pramanik, pupujan menak-menak, sipat masalah nu muskil, nu rumbit dina ati, elmu kalawan panemu, baris dunya aherat, didadar dijieun hasil, dibuktikeun pertata pasal perceka

Tani tigin hanteu tuna, jujur maju ngajar ngaji, ngajadi pandita harja, hanteu kurang harta harti, padamelan binangkit, bangsa ngarara ngaraut, sarta ukir ukiran, ngajeujeut jeung ngamanjait, pinter ngatur ngendah ngendah palataran

Dangdanggula

Waktu eta pasantren Pramanik langkung langkurng jembar sarta hegar, taya bangsana pasatren, tina pinterna guru, nyieun conto ka santri santri, mentakeun hal ihtiar, malar senang hirup nandangan dikamulyaan, kacaturkeun eta sang wiku Pramanik kagungan hiji putra.

Putra istri sarta leuwih geulis, kakasihna Sang Dewi Kania tacan kagungan caroge, geulisna estu punjul manjing basa lir widadari, yuswana kira-kira, lima belas tahun, endah taya papadana, sarta pantes disebut mustika istri, waktu jaman harita.

Eukeur geulis kawuwuhan rajin, percekana sagala iasa, sipat papagon awewe, kasar mori teu wudu, turug turug sabar tur lantip, sabab watek kalimah, wantu putra wiku, ngagem jatining Patimah, sarta nitis sumantri di sanubari, dianggo  salawasna.

Enya eta kasetyaan galih, ampuh timpuh lungguh hade lampah, sareseh sae bubuden, cangker singer tur akur, yasa basa jeung tata titi, mun ka semah someah, tindak undak usuk, balabah gede wiwaha, sarta surti kana sagala perkawis, elmu kasasmitaan.

Tangtu panjang lamunna ditulis, binekasna Sang Dewi Kania, mustika putri pasantren, kacatur Maha Wiku, waktu eta linggih di masjid, jeung sakabeh muridna, ngawuruk bab nahu, jeung sagala kitab-kitab, sakumaha papagon elmuning resi, anu keur dimuradan.

Hanteu lami utusan di nagri, Dendaturu ka pasantren dongkap, barang ku wiku katangen, kaget sartana muru, jeung sakabeh prasantri santri, cungcong nu marunjungan, hormat ka tatamu, ku Wiku lajeng disambat, eta mantri dicandak ka jero bumi barina mamandapa.

Linggihna ge dipasang alketip, jeung pahibut pada dangdan dangdan, alur tedak nu katamon, linggih papayun-payun, mantri Denda sareangan Resi, kitu deui garwana, hibut urus urus dangdan keur leueuteunana, jeung tuangeun nyisih-nyisih baris Mantri, Nyai Dewi Kania.

Mantri Denda barang ret ningali, enya ka eta Dewi Kania, hookeun teu petot mencrong, kagetna langkung langkung, da saumur kakara manggih, mungguhing kageulisan, nu sarupi kitu, barang tuang ge hanteu am, da kasima ku ningali anu geulis, datang ka ngucur kesang.

Hanteu lami Sang Resi ka Mantri, teras naros sarta kieu pokna, “Pun paman kalintang kaget, wirehing ku saumur, kasumpingan Juragan Mantri, istuning langkung reuwas, wantu anu dusun, titisan terah padesan, mugi-mugi juragan enggal wawarti, naon margina lenggah.

Semu aya nu bade digalih,” Mantri Denda teras ngawangsulan,”Menggah kang putra sayaktos, margana aya perlu, ka keresa kang rama Resi, wireh nampi dawuhan, ti Sri Maha Ratu, ngabantun serat ka rama, hanteu lami serta ku resi ditampi, sarta kieu unggelna.

“Wiku Kurbah Pasantren Pramanik, marga kula ngirim ieu surat, malar wiku terang bae, kaula menta tulung, pangjaringkun masing utami, ku piwulang pituah, jalan geusan mulus, anak kula ki Purnama Alam, pamaksudan rek masantren di Pramanik, ngaji elmuning kitab. Rek diajar elmuning susuci, perjalanan pertata agama, teteskeun sing hade hade, sarta ku resi kudu, jaring dina beurang jeung peuting, bisina luluntaan, nyaba ka nu jauh, eta ulah meunang pisan, Ki Purnama kana dibere idin, caram sabeunang beunang. Ngan sakitu kula pameredih, salam kula

                                                                                       Ratu di Riskomar Narpatos Dewa Pramayon

Barang Resi geus tutup, ngaos serat pasihan Gusti, langkung langkung bingahna, teu eureun nunuhun, raos tina dipercaya, hanteu lami nyarios ka Raden Mantri, Wiku Muhamad Kurbah.

“Aduh aduh paman nindih takdir, nyorang mangsa kamulyaan badan, sabobot keton saewon, kagunturan ku wahyu, taya tanding kabingahan ati, nampi pangeresana, Sang Sri Maha Ratu nimbalan ka diri paman, Sang Pangeran kedah diaping dijaring kersana ngaos kitab.

Rebu rebu nuhun lahir batin, rek dianggo sarta diuninga, marga kamaasan bodo.” Raden Mantri ngawangsul, “Margi eta ayeuna mugi, kang rama kedah pisan dinten ieu ngutus, beberes ngosongkeun tempat, anu gede pondokna atanapi bumi, keur pilinggiheunana.

Tina margi sumpingna pinasti, roa nyandak barang barang, saeusi kaputren bae, rencang rencang mo kantun, moal cekap ku tempat alit.” Sang Resi ngawalon, “Paman neyteu ewuh, ku tempat pikeun lenggahna, tina margi awon awon mah sayagi, rorompok patamuan.”

Sabadana Sang Resi wawarti, lajeng nyaur ka santri sadaya, ngembarkeun maparin nyaho, bakal sumping Sang Sunu, dimistikeun kabeh prasantri, kerna Allah seseka, ngored jeung sasapu, bebers di patamuan, santri santri barang nampi saur Resi, teras pada ubiag.

Ngajalankeun parentah Sang Resi, nu sasapu sawareh nu mulas, nu ngome pager jeung ngored, sarta kabeh teu suwung, hayang geura Sang Sunu sumping, tina sabab kawentar, yen kasep pinunjul, palikirna hayang geura, ngabuktikeun kasep gumilangna sidik, ulah bet wungkul beja.

Bersambung