Purnama Alam bag.2

Harita Sri Maha Raja keur linggih di srimanganti, sarengan pramesawara di deuhuesan ku papatih, Arya Gundara Pati, teu lami ratu ngadawuh, “Eh Patih, marga kakang nyaur teh arek badami, hal perkara si ujang Purnama Alam. Estu matak jadi susah, ngarudetkeun kana ati, karasa dua perkara gumanteng di sanubari. Ari anu ngajadi kana tunggara kabingung, kahiji, nu geus nyata, Ki Purnama Alam mungkir ka Kasmati nampik teu daekeun nikah.

Jeung kadua perkarana, kakang leuwih leuwih risi, ku watek Purnama Alam, bet matak nyangarkeun nagri, geus manggih beja sidik, awese pada kairut, tagiwur uru ara, teu nolih boga salaki pada datang ngahelaran ka kaputran.

Eta leuwih matak susah, pasti jadi guyur nagri, baruntak jeroning kota, asal hanteu repeh rapih, abdi-abdi nu leutik, tangtu tagiwur timburu, moal aya lulusna, jeung pasti moal sak deui matak nungtun bahaya ka Purnama Alam.

Tah eta kuma petana, kakang leuwing suah ati, cing ayeuna kakang menta, pirempung ki Arya Patih, akal geusan lastari, nu bakal ngabendung bingung, mukahkeun ka susahan, hanteu lami Arya Patih, nyembah hormat ka Sang Sri Nata

“Abdi Dalem nampi pisan, kana sadaya panglahir, pasal ngagem kasumpegan, kersa Dalem nu sayakti, ku abdi dalam kering, sakalintang marga ewuh, mung katur permuhunan, yaktos putra Dalem mugi, ulah waka dipaksa kana garwaan.

Bok bilih dina akhirna putra Dalem henteu jadi, kana marga kalulusan, pista ka Putri Kaswati, ngabongankeun  diahir. Ka kersa Dalem nu estu, tangtos wuwuh kewuhan, kana salebeting galih, putra Dalem San Sunu Purnama Alam.

Amung manawi rempag mah, klayan kersa Dalem yakti, sae jujur kahoyongna, ngalap sipat ilmi ilmi, haliah lahir batin nyusul panemu nu luhung, geusan kawilujengan.” Teu lami Ratu ngalahir, “Najan kakang teu pisan rek ngahalangan.

Kana maksud Ki Purnama, yen nyiar bangsa pangarti, malah jadi kabungahan, ngan nya eta anu jadi, ku embung boga rabi, kadua ku matak guyur,  anu bakal ngagoda, awewe nu jadi iblis, kasetanan narik lampah kalacuran.

Tatapi lamun rempug mah, reujung Ki Aria Patih, ka kakang bareto aya, hiji wiku menta idin, cicing di tepis wiring, tanah pangawatan kidul, di Gurangsarak, menta jadi guru santri, rek ngamalkeun kitab papagon agama.

Ku sabab eta ayeuna, pakasud kakang pribadi, perkara Purnama Alam, arek dijurungkeun indit, sina di wiku cicing, minangka buang ka gunung, pasantren Gurangsarak, sugan sanggeus jadi santri, purun nikah ka Putri Ratu Ambarak.

Jeung kadua perkarana, ku kakang anu dipamrih, arek dipake tanggelan, awad ka yayi Narpati, nyuhunekun tempo deui, Purnama arek disebut, keru nuju ngalap kitab, elmu panemu tiresi, rek dipake daku ka Ratu Ambarak. 

nyambung ka Purnama Alam nyantren (bag 3)