Di kampung si Kabayan aya jelema jegud katelahna si Abah Ontohod. Disebut Ontohod soteh da teu kaop nyarekan ka anak buahna teh sok bari nyebut dasar "ontohon siah" cenah. katelah bae ku urang kampung teh Abah Ontohod. Si Abah Boga parawan ngan hiji, kaasup geulis di kampungna mah ngan kulitna rada hideung, hideung santen katelahna mah, hitam manis tea. Kusabab kulitna hideung santen, anak si Abah sok dipanggilna si Iteung.
Si Iteung teh keur meujeuhna beger nyaeta keur resep ka lalaki, geus waktuna kawin cenah. Tapi si Abah embung boga minantu nu teu puguh, kudu hade, loba pamake jeung loba kabisa. Ngan teuing ku naon si Abah teh hayang boga minantu teh anu irungna seukeut. Nyeta seukeut ngambungna. Cenahmah supaya mun ulin ka huma bisa ngambeu jurig, maung, ajag jeung sasatoan lain ma'lum humana ge lega. Jadi bisa kabur samemeh di panggih jeung maung.
| sumberimage:droppedbox.wordpress.com |
Ku lantaran kita, Si Abah nyieun bewara, sing saha jalma anu boga irung seukeut, bakal di kawinkeun ka nyi Iteung. Atuh ear sakabeh anak muda teh. nyiapkeun diri ngasah irung supaya seukeut. bakating hayang meunangkeun Nyi Iteung. Barang ngilu saembara mah euweu hiji ge nu lulus tina ujian si Abah.
Ari Si Kabayan salah saurang di jajaka di kampung eta, jalmana ngedul, pagaweanna ngajentul bae nangkeup tuur bari moyan di harudung sarung, kadang-kadang ngagere ceuli ku bulu hayam, bari peupeureudeuyan. Babaturanna rame latihan ngasah irung, manehna mah tara pipilueun. Nanahaon cenah moal aya hasilna.
Dina hija poe, Arnasan babaturan dalitna ulin ka Si Kabayan, terus nanya, "Kabayan, teu ngilu saembara euy?"
"Hoream ah, keun bae ari geus takdir mah si Itung pasti kapimilik ku kuring."Ceuk si kabayan bari diharudung sarung.
"Lain kitu Kabayan, ari takdir teh kudu jeung usaha atuh, ari ngajentul kitu mah moal datang jodo ka nyaneh. lain maneh bogoh ka si Iteung?" Ceuk si Arnasan mapagahan.
Si Kabayan ngajawab, "Ari bogoh mah heueuh atuh, najan hideung ge da geulis atuh, nya beunghar deuih. jeung sigana mah manehna ge bogoheun ka dewek, hehehe..." Ceuk si Kabayan ngagul
"Tah gening, ari bogohmah udag atuh!" ceuk Arnasan
"heueuh lah, rek ngiluan, tapi nginjeum duit nya, keur modal nyeukeutan irung!" Ceuk si Kabayan bari cengkat.
"syukur atuh ari rek ngilu mah, tah dibere modal. Engke balikkeun mun geus jadi minantu si Abah nya,"Ceuk Si Arnasan bari nyengir.
"Gampil lah, tingali we gera,"Ceuk si kabayan bari ngaleos teuing kamana. ngan inditna ka lebah pasar.
Si Kabayan ngajugjug ka toko bubuahan. balikna angkaribung mawa samangka, rambutan, buah, cau jeung kadu.
Isukna si Kabayan indit ka imah si Abah ngadaptarkeun diri ngiluan saembara.
Pas bagean si Kabayan, Si Abah ngajak ka huma, rek nyoba irungna nu seukeut bari sakalian nguji gawena di huma.
"Hayu Kabayan urang ka huma, bawa tah pacul na!"Ceuk si Abah
teu talangke si Kabayan indit mawa pacul jeung make dudukuy laken. padahal sasarina mah tara ngilu nyekel pacul-pacul acan.
Geus nepi ka huma, gecruk macul. Abong jalma tara gawe, karek meunang sabaraha lengkah ge geus nyeri cangkeng kukuliatan.
"Kunaon Kabayan, gawe teh cengkat wae!"ceuk si Abah nyengor.
"Sanes Bah, ieu pangambung asa ngangseu naon nya." Ceuk si Kabayan bari irungna di ingsreuk ingsreuk
Si Abah curinghak, "Bau naon tah Kabayan?
"Pami teu lepatmah ieu teh asa bau rambutan Bah."Ceuk si Kabayan bari luak lieuk.
"Hayu atuh Kabayan, teangan gera!"Si Abah siga nu bungah
Si Kabayan leumpang ka lebah rungkun cau, bari irungna ngangseu.
"Bah, ieu ning aya rambutan, meni seueur!"Si Kabayan ngajorowok, bari ngangkat leungeuna pinuh ku rambutan.
"Alus tah Kabayan, hayu urang dahar!"Ceuk si Abah bari nyampeurkeun.
Si Abah jeung si Kabayan dariuk bari ngadaharan rambutan nepi ka teu nyesa.
"Yu ah Kabayan teruskeun gawena," ceuk si Abah
"Hayu Bah,"Ceuk si Kabayan bari nyumputkeun ka seunggahna.
Gecruk macul deui, nya kitu we abong jalma tara gawe karek meunang saeutik kuliat deui.
"Bah, asa aya bau deui,"Ceuk si Kabayan
"Bau naon deui Kabayan?"Si Abah panasaran
"Asa bau kadu, bah."Jawab si Kabayan
"Waah kabeneran Kabayan, resep pisan kana kadu teh, hayu atuh urang teangan!"ceuk si Abah bari cengkat
Seperti tadi bae, si Kabayan leumpang bari ngangseu bau kadu.
"Tah gening Abah, aya kadu teh, dua siki arageung."Ceuk Si Kabayan bari ngangkat kadu
"Alus Kabayan euy, urang purak kadieuh."Si Abah bungah
gek maranehna dariuk bari balakecrakan ngadahar kadu.
sanggeus seubeuh, jung harudang deui nuluykeun hanca gawena. Kitu we satiap cape saeutik si Kabayan sok hudang bari nyebutkeun bau buah-buahan. Nepika buah-buah anu meunang meuli ti pasar nu ngahaja di sumputkeun teh beak.
Keur macul bari ngararasakeun nyeri cangkeng, si Kabayan mikir, "Kumaha yeuh, nya buah buahan geus beak, pagawean masih loba deuih, kumaha akal yeuh?ceuk na jero hatena.
Keur anteng macul, si Kabayan hudang bangun nu kaget.
"Aya naon Kabayan?" Tanya si Abah bari ngilu reuwas, ningali si Kabayan ngadadak hudang
"Aya bau bauan Abah."Ceuk si Kabayan
"Bau naon deui Kabayan, hayu urang teangan, sugan we buah2an deui, alus manehmah boga irung teh, cocok lah keur mantu Abah mah,"Ceuk si Abah bari nu semu bungah.
"Nuhun Bah, tapi ieu bauna asa aneh Bah, sanes bubuahan."Ceuk si Kabayan
"Bau naon Kabayan?"Ceuk si Abah
"Asa bau Maung Abah!"Ceuk si Kabayan bangun nu sieun
"Kabur geuwat Kabayan, bisi dikerekeb siah!"Ceuk si Abah bari tipaparetot lumpat teu nolih deu ka Si Kabayan.
Si Kabayan lumpat nuturkeun bari siga nu sieun padahal manehna nahan seuri.
Tah tidinya, kulantaran irungna seukeut manehna meunang saembarana, hadiahna dikawinkeun ka si iteung.
Eta asal usulna Si Kabayan rimbitan jeung si Iteung, hehe.
0 komentar:
Post a Comment