Purnama Alam kabungbulengan, ngedalkeun rasa ka Dewi Kania : Purnama Alam bag 6

Asmarandana
Rajaputra hanteu lami wawarti alon tur tata, aringgis nengtog salah pok. Dumugi nyutat babasan lir pikeun ka sasama, tina hanteu rempan kalbu, engkang ngabasakeunana.
"Aeh enung Nyai Dewi, marga ku engkang diala, engkang teh arek wawartos supayana Nyai terang lalakon diri engkang sababna nu matak cunduk ka Pasantren Gurangsarak.

Karasa tilu perkawis, leuwih leuwih nandang susah,ku bodo katotoloyoh. lantaran engkang ku bongan gede teuing kadunyaan

abong katungkul ku hirup kakenyang ku pawenang. leungit titisan ti aki, ilang terah pupuhunan, agama dimore more, atuh engkang nyorang bahya, ngajadi bodo  kemba hanteu miruruh kaweruh, tara ngala pangawasa. Kadua engkang keur nyangking lara jeroning pangrasa taya papadana bae, jalanan engkang kasurak ku jalma nu curang. guyur pada nyebut nyebut tukang nyangarkeun nagara. dipirisi ku pulisi, dipibingbang ku kapala, pajar engkang juru pelet, sok ahli ngeret ngirutan kawas ka bangsa setan, nyangka ngaji elmu buhun hal nu henteu pisan pisan. Asa beunang ngati-ngati risi mangsa nyorang salah. tapi aya aya bae nu jadi goda rancana. Nyai ge tangtu terang nu jadi sababna guyur, turug turug engkang baha nu asih dipulang sengit, nu nyaah di pulang moha, engkang ngadolos bedegong, bedang ku embung garwaan ku sabab tacan hayang. atuh engkang teh ditundung, dibuang ka Gurangsarak.  Teu meunang cicing di nagri engkang ku kersa jeng rama kudu aya dipasantren. Hukuman sangar jeung baha, eta kitu sababna bilih enung henteu maphum raratan engkang sorangan.

jeung anu margi engkang teu purun garwaan tina ku ramasa bodo da resep keneh ihtiar, neangan pabanisa. Meungpeung keur ngalarap hirup, ngambang di bangawan nyawa. Itikurih nyiar harti, ngalap pertata sasmita, papagon pangeusi hate ka bangsa para budiman, nu ninggang kasampurnaan, nu ngagem elmuning luhun, nu geus jejem kapahingan.

Leuheung lamun boga rabi ka nu jembar pangabisa, ngabengkot rebo ku hartos, pulunganen ati engkang, hal bagbagan agama, itung nyalindung ka gelung, wayahna lara ku era. pikir engkang nu sayakti, mungguhing waktu ayeuna, teu heroy ku urang gedong, teu hayang nu di pamengkang, ari di kira kira, teu matak ngawuwuh elmu, nya nambahan pangabisa. Kajeun ririwit ku nyeri, nalangsa nadahan lara, nyorang kana baya maot, tinimbangan engkang jeung beunang kana dipacang pacang, da lain rek ngarah untung, kana sipat sipat barang.

Kajeung nindih kana pati, balangsak jeroning alas, jadi gandek di pasantren sugan dianggo lumayan, didamel tukang adan, jeung sambian ngalilipur, anu jadi kasukeran

Ngan ayeuna engkang mugi, paparin panglejar manah, piwelas Nyai nu yaktos, mungguhing ka diri engkang, tina engkang keur nandang, kallimpudan ku bingung, ku Nyai geuwat tulungan.

Sugan bae awal ahir, engkang bagja kana kadar, dina pepes lipur hate, geus nyingkir ti kasukeran, engkang mulang tarima, nyebor ku sakujur tungtung, mulang ka pangrasa badan. 

Dewi Kania ngaharti, kawantu istri budiman, elengeh jeung mere sareh, ngawangsul ka Rajaputra

"Duh gusti jeng Pangeran, perkawis eta pangdawuh, estu kalangkung ahengna. Menggah dipikir ku abdi, sakalintang marga berat, cocogeh gamparan yaktos, moal kenging dilandongan, upami kasawat mah, uduneun dina paneku, matak geseh piangkatan. Sareng gamparin milahir, mundut deudeul pertulungan, menggah ka abdi nu bodo, abdi-abdi ku tiasa, nu lintang hina papa, juru dusun urang kampung, ngadeudeul lenggah gamparan. Amung abdi sayakti, bubuhan nampi timbalan, sumeja kumambang bae, ngalandongan kaewuhan, manawi tiasa, mung ayeuna pamit wangsul. barempang sareng pun bapa. Upami parantos kenging, dumeuheus deui kantenan."

Ngalahir deui Sang Anom, "Ih Nyai engke heulaan, engkang teu acan tamat, mitutur awit kabingung, muka jalan kasusahan. Ku engkang enggeus kapikir, najan ngider sabuana, baris landong juwet hat, rasa engkal moal meunang ari lain Nyai mah, ayeuna ge geus puguh karek gok mirasa senang. Reujeung deui montong Nyai, gana gana kumawaa, ka kolot waka ngarewong, kudu timbang-timbang heula kana minangka saraya ulah rusuh catur geruh, engke sepuh mah tungtungna."

Sang Dewi ngawangsul deui, "bilih teu acan kamanah, margi abdi enggal soteh barempang sareng pun bapa, rempan ningal kasawat, bilih tungtung hanteu puguh, salempang serong ahirna."

Imut Pangeran, ngalahir, "Ih atuh sukur kacida ari nyantel dina hate, geus nyangsang kana pangrasa, heg atuh geura mulang, jeung ieu lumayan enung, candak wang sapuluh dinar. Minangka panyecep ati, buruhan gampang nampanan, meresen hade bubuden."

Sang Dewi Kania teras nyembah nampi pasihan wuwuh dilak panglucu, reujeung imu pangirut. Dewi Kania seug mulih, geus medal ti patamuan, mulih ka bumi pasantren. Kacatur anu ditilar, Rajaputra Purnama, kapincut ku nu geus wangsul, kagendam ku semah mulang. manah ti balik pangeusi asal pengkuh jadi rucah, awit cecem jadi ngecom, taya deui nu kacipta, wungkul Dewi Kania, siang wengi nandang wuyung reh inggis henteu laksana.

"Duh aduh jungjunan ati, kembang soca buah manah, nu geulis panutan hate, ieu engkang nyorang baya, nandang sangar pangarasa, nuju kalampud ku bingung, narajang gering pikiran. 

Awit kabadi ku budi, asal kasibat ku basa, jadi meulit kusut hate, daek-daek engkang pejah, lamun hanteu laksana, pasti undur tina hirup, lantaran kabaluasan.

Katumbiri sumping wengi, kuwung kuwung ngubeng bulan, naha hanteu melang enong, ka diri engkang nu lara, anu eukeur ngumbara, ngalantung ngagandung bingung, lalewang pikir nyoreang.

Kakara saumur hurip, ngalara tunggara rasa, banjir rarambuning hate, kadangkala kapisanan, nadaahan kalampusan, bawaning ku susun-susun, nandangan kabaluasan.

Aringgis hanteu kacangking, salempang bok hanteu beunang, aduh mustika pasantren, Kania nu kaniaya, wani nibakeun baya, nganjang gugup gurunggusuh, bet abong istri nonoman."

Nyambung ka Purnama Alam nikah ka Dewi Kania: Purnama Alam 7