Dongeng Tatar Sunda : Si Kabayan Ngala Nangka

Si Kabayan teh minantu Abah hiji-hijina (da anakna ge ngan hiji nyeta si iteung). Si Abah sok kesel ka si Kabayan teh, keur mah nganggur, ngedul pagaweanana ngan sare wae teu isuk teu beurang, komo peuting mah. Da si Abah ge heran ka nyi Iteung teh naha bet bogoh ka jelema kitu, pikirna meureun dipelet tah si Iteung teh ku si Kabayan. 

Dina hiji poe, biasa si Kabayan mah keur sare we dina korsi panjang diharudung samping sarung. Kurunyung si Abah ti jero Imah, jol ngomong bari ngageuingkeun si Kabayan.

"Kabayan, hudang siah! maenya wayah kieu masih keneh molor. tuh gawe siga batur!" ceuk si Abah 

Kuniang si Kabayan cengkat bari nguliat. 

"Na Abah hirup teh bet ngaripuh-ripuh diri, kan pare ge loba dileuit, hirup teh sakeudeung Bah, tinggal nikmati hirup," Ceuk si Kabayan teu kireum kireum siga ajengan.

Ngadenge jawaban si Kabayan, Si Abah nyengor.

"Ari sia kabayan ngomong teh teu jeung adeuh. Ari eta pare ti mana? menang gawe tateh lain datang sorangan. Mun teu gawe rek datang ti mana eta beas?" si Abah jamotrot bakat ku kesel

"Haar ari Abah, siga nu teu percaya takdir. Ari rijki teh Alloh nu ngatur, Abah. Teu gawe ge datang sorangan. Coba we abah tingali, eta cakcak teu bisa hibeur, dahareuna reungit nu bisa hibeur. Kuduna mah kalaparan, tapi reungit datang we gening ka hareupun  cakcak, tinggal hap dilegleg." Si Kabayan ngomong bari nyengir. 

"Ah sia dah dasar pangedulan, hese ngomong jeung maneh mah." ceuk si Abah. Dipikir ku si Abah moal meunang adu omong jeung jelema ngedul mah. Da jelema ngedul mah goreng gawe pinter ngomong. Si Abah ahirna nyarita deui.

"Kabayan, abah rek nitah ka maneh. Pang galakeun nangka di kebon, nu tangkalna sisi gawir. Ala kabeh nu kolot, nya..! kade nu ngora mah tong di ala!" ceuk si Abah.

"Kumaha ngabedakeuna bah nu ngora jeung nu kolot?" Ceuk si Kabayan

"Keplak ku maneh nangka na. Mun kolot sorana "Blug blug blug" mun nu ngora "plak plak plak". Si Abah mapagahan si Kabayan

"Enya atuh Bah, uing indit," ceuk si Kabayan bari nguliat. Kapaksa manehna indit ka kebon. 

Sing horeng tangkal nangka si Abah teh aya percis dina gawir, tangkalna rada doyong ka lebak. Ari di lebak aya walungan. 

"Aduh euy, gening kieu tangkalna, kumaha mun uing ragrag nya..."Si Kabayan rada gimir ningali tangkalna rada doyong. tapi kusabab tangkalna gede, kuat oge katingalinya. Teu talangke, terekel si Kabayan naek kana tangkal nangka. Eta tangkal nangka teh leubeut kacida. Inget kana papagah si Abah, hiji-hiji nangka teh di keplakan. Plak plak plak, atah pikirna teh, diantep we teu dipalire. Aya hiji nangka gede, ceuk pikirna kolot ieu mah, pas dikeplak disada

"BLUG BLUG BLUG.....

"heueuh kolot euy..." ceuk si Kabayan gumbira. 

Kecrek! nangka dikadek ke bedog.

Gurusak....! nangka murag ka lebah....kecemplung ka walungan ka bawa palid. 

Kaget si Kabayan!

Ningali nangka palid ka hilir, si kabayan mikir, "heueuh alus maneh nangka balik sorangan jadi uing moal caep". cenah si Kabayan ngagerendeng.

Kabeh nangka nu geus kolot ditigasan, murag ka walungan ka bawa palid.

Geus kitu si Kabayan baling bari lenggang kangkung teu mawa nanaon, ngan ngajingjing bedog wungkul. geus nepi ka imah, di tanya ku si Abah.

"Kabayan, geus ngala nangka teh?"

"Atos Bah!" si Kabayan ngajawab

"Mana nangka na?" Si Abah heran, da teun ningali si Kabayan mawa nangka

" Haar, can datang kitu bah nangkana?" si  Kabayan ngajawab beri kerung. 

"Na saha nu mawa kitu, Kabayan? da euweuh nu nganteur nangka kadieu ti tatadi ge." si Abah bingung

Ahirna dijelaskeun ku si Kabayan:" Sanes Bah, kieu carita na mah, tadi teh abdi teh ngala nangka. Nya ceuk abah nu blug blug blug geus kolot. ku abdi teh di kadek we. Ngan eta nangka teh ka walungan. balik sorangan. Sugan teh geus nepi." si Kabayan ngajelaskeun bari jeung husu. 

Ngadenge carita si Kabayan, gantawang si Abah nyarekan bari tutunjuk bakat ku ambek."

"Naaaa  ari sia Kabayan! bodo teu meuni dibekeun sorang. Maenya nangka bisa balik sorangan...Blegug siah!' Ceuk si Abah

"Lain uing bah nu belegug mah. Tapi eta nangka, maenya geus kolot teu apal jalan balik." Ceuk si Kabayan teu kireum kireum

Teu di denge ku si Abah, teu antaparah Si Kabayan di gusur ka hilireun walungan neangan nangka sugan we aya nyangsang di walungan. untung we aya keneh tilu nu nyangsang.